Tit 1 | MHL | STEP | Aria Taitus, yo Mua Maneka uuwow mua ne Yeesus Krais aposel Pol-ke parosifa fain no siisimomiyem. Mua Maneka ona efa pepekimeya ona teeria iiriw wia nanikap-puak nain opora baliwep wia maakemkun ona opor makena baliwep akena wiar opikuan. Ne opora opap kema pukep baliwep paayarep Mua Maneka sira-pa ikaikuan.

Titus 1

1 Aria Taitus, yo Mua Maneka uuwow mua ne Yeesus Krais aposel Pol-ke parosifa fain no siisimomiyem. Mua Maneka ona efa pepekimeya ona teeria iiriw wia nanikap-puak nain opora baliwep wia maakemkun ona opor makena baliwep akena wiar opikuan. Ne opora opap kema pukep baliwep paayarep Mua Maneka sira-pa ikaikuan. 2 Naap onami Mua Maneka wameiya anane eliwa ikaiyen naap maep kemaiw wiam tuupam-ikaikuan. Wi ikoka maa makena urufikuan, moram Mua Maneka me wadolaliya, iiriw miiwa maa muutitik me onowa ikok ona opora naap maep-puak. 3 Opor eliwa makena arowowa naep ona epa iiriw pepekimep-puak. Epa nain wiar pepek ereya opora nain ariman wuak. Ne o eena yia aawow mua nain-ke yo efa maakemi efa sesekeya opora nain piawomiyem.

4 Aria Taitus, muuka, makena i ikos Yeesus Krais opora wiar opimik. Yiena Auwa Mua Maneka ne Yeesus Krais yia aawow mua, nefa saliwami kema sonom eliwa niuk.

Taitus Krit-pa uuwak

5 Yo feenap maep no Krit mot-pa nefa wuam, nos-ke neek ikok yo uuwowa enakiwa wuam nain welawe naep. Uuwami owow unowa sios woos mua wia pepekim-ikiwe, yo nefa maakem naap. Mua sira baliwep wiar pupep wia pepekime. 6 Wi mua feenap nain wia maiyem, mua nain pina-ko me oniya, o emeria kuisow, ne muuka wiipa Mua Maneka opora wiar opap sira samora me onimik, ne emina me kekanimik. 7 Wi woos mua ikok Mua Maneka uuwowa faomami wiena teeria baliwep wia urufam-ikowa-ke. Naapeya wi pina marew ikauk. Yo yaisow naap me wiam mauk, ne mua ewur kema bagiwirow marew, ne pun mua wia iririmowa marew. Eka kekanowa me eruaruk ne maamuma me senam kookaluk. 8 Owow oko mua kereriwkin wia tetaruk, ne sira eliwa onuk. Mua kema suuwowa eliwa, Mua Maneka opora ookuk, mua oko wia saliwuk ne wiena kukusa pun baliwep wiam saliwuk. 9 Yeesus Krais opor makena ne kekanowa eena wia maakemik nain opuk. Opora kakeniw opap mua papako wia maakiwkin opora wiar opikuan. Wi naap onami wia kakeniwkin wi sira samora-pa ikemik nain kema aawikuan. Wi mua sira naap nain wia pupep wia pepekime.

10 No naap uuwam-ike, moram kame nain mua unowa emin kekanowa-ke, ne opor maken marewa nain maemi wi Kristen teeria wia peeskimimik. Ne wiena pun Mua Maneka me amisaremik. Wi Yuuda Kristen aremik nain mua lawisiw unowa naap onimik. 11 Wi wadol opora naap nain me wia maakowa nain wia maakimik. Wi maamuma wiar aawowa muuta nain naap wia onimik. Naeya wi kerekera papako Yeesus teeria wiar ekamik nain wi opora wiar miimap unow onaiya opor makena piipuamik. Naapeya wi mua nain opaimika wia ofome. 12 Wi wadol sira nain iiriw wiena amis mua oko-ke feenap wia maek, “Wi Krit-na wi wadol masia, wi asia akena, wi lebuma ne enow masia-ke,” naap wia maek. 13 Opora naap wia onak nain makena. Naapeya wi wadol opora wiar ookimik nain wia kakankami ifana wiare, naeya Yeesus Krais opora wiar opap kekanowa iimaruk. 14 Ne wi Yuuda wiena weke nanar wadola nain makena me wiar nauk, ne wi mua Mua Maneka opora mikikira iwemi sira wuomakimik nain pun me wiar ookuk. 15 Moram sira naap ikua, wi Mua Maneka sira ookam-ikok kema dubil manekiw ikaimik nain sira eliwa muutiw kema wuimik. Ne wi sira samora-pa ikok opor makena me ookimik nain maa samo-samora kemaiw ikaimik. Moram sira eliwa ne sira samora rookasowa nain wi iiwawun kema marew akena. Wi sira samora onimik nain maa eliwa-ke naimik. 16 Wi wiena i Mua Maneka ookimik naimik, nain wi sira-sira onami o mikikira iwimik nain-ke ariman wia wuiya. Wi mua nain mua eliw marew, emin kekanowa, ne sira eliwa ookowa nain wi me pepek akena.